"Адыгэ унэу" къалэу Мыекъуапэ дэтым чIэлъ адыгэ лъэпкъ пкъыгъохэр
Адыгэ Iэпэ щысэхэр джырэ уахътэм зышIыхэрэр АдыгеимкIэ зырызых. Ащ фэд илъэс 20 хъугъэу лажьэрэ хъызмэт купэу «Нан» зыфиIорэр. Пхъэм, гъучIым, шъом хэшIыкIыгъэ Iэнэ зэкIэтхэр, кушъэхэр, пIуаблэхэр, адыгэ шъуашэхэр ащ щашIых. Адыгэ саехэр зыщыгъ фарфор нысхъапэхэр мы пкъыгъомэ къахэщхэрэмэ ащыщ.
Нысхъыпэмэ адэлажьэрэмэ къызэрэхагъэщрэмкIэ, ахэр анахь пкъыгъо дэгъумэ ахашIыкIы, агъэлэжьышъ, шэкIыр рахьылIэ. Шъуашэу щалъэрэр анахь шэкI дэгъумэ ащыщ, еIо Фитыныгъэ Радиом игущыIэгъугъэу, «Нан» зие IэпэIасэу,адыгэ саехэр зыдырэ ХъутIыжъ Симэ:
ХъутIыжь Симэ: Лъэпкъ пкъыгъо пшIын зыхъукIэ, бэ епхьылIэнэу щытэп, пIэ къыIэкIахьэу уиIэ закъокIэ, уимылку хэмыгъэкIуадэу пшIы хъущтэп. Аущтэу удэзекIощтмэ, уекIолIэнэу щытэп лъэпкъ пкъыгъор. ОкиIэмалы къикIкIэ ахэр дэеу бгъэлъэгъонэу щытэп. Аущтэу тIэкIу къыщыбгъэкIэщтмэ пIэ епхьылIэнэу щытэп.
Фитыныгъэ Радио: Сим, нысхъапэу шъушIырэр зэрагъэгъотмэ ашIоигъоу къыкIэупчIэха?
ХъутIыжь Симэ: Нысхъапэр агу рехьы. Къэгъэлъэгъонэу зыдэтымыщагъэ щыIэп. Зым ашIолъапI, зым хьаIу. Ау непэрэ мафэм ащ хатлъхьэрэр къызэрэхэтымыхыжьрэр гъэнэфагъэ. Ау аущтэу щытми тиIоф лъэтэгъэкIуатэ.
Фитыныгъэ радио: Нысхъапэр тыдэ зыщзэбгъэгъотын плъэкIыщтыр?
ХъутIыжь Симэ: «Адыгэ унэм» ахэр чIэтых. Бэ хъухэрэп. Илъэсым тIу тшIыми ары. Бэрэ тыпэлъы. ЗэкIэ хатлъхьэрэр IапэкIэ тэшIы.
Фитыныгъэ Радиом игущыIэгъугъэ ХъутIыжъ Симэ гугъапIэ иIэу къыхегъэщы, адыгэмэ ащыгъупшэжьыхэрэм джырэ мафэмкIэ, къагъэзэжьын амал яIэнэу.
Фитыныгъэ Радио, Щэрджэс Ларис
