КъБР и хьэкум нэхъыщхьэм нобэкIэ Сирием къикIыжа адыгэ щIалэ Отхман Аял зызэрыхуигъэзахэм и ныкъуэм арэзы техъуэри абы Урысейр ибгынэн хуейуэ къащтауэ щыта унафэр икъутэжауэ утыку къырилъхьащ абыи учыл Къардэн Мухьэрбий.
Фигу къэдгъэкIыжынщи мэзаем и 10-м Налшык и къалэ хьэкумым унафэ къищтауэ щытат Сирием къикIыжауэ еджакIуэ КъБР-м щыIэ адыгэ щIалэхэу Стас Ясер, Абазэ Нарт, Отхман Аял сымэ Урысейр ябгынэн хуейуэ. А Iуэхум и къежьапIэр а щIалэхэр мэзаем и блым Сочэ щIымахуэ олимп джэгухэр къызэрыщызэIухымкIэ я мыарэзыныгъэхэр къагъэлъагъуэу щIалэгъуалэ гуп Налшык къыдэхьахэм яхэтыуэ хабзэхъумэхэм зэраубыдаращ. ЕджакIуэхэм зэрыжаIэмкIэ ахэр зэрымыщIагъэкIэ ахэм яхэхуа хъуауэ аращ. Стас Ясер абы иужькIэ Урысейр ибгынэри Сирием игъэзэжын хуей хъуащ. Отхман Аялрэ Абазэ Нартрэ КъБР-м и хьэкум нэхъыщхьэм и дейж я хуитыныгъэр щахъумэжынууэ иужь ихьахэщ. Гъатхэпэм и 19 Налшык и къалэ хьэкумым аргуэрыуэ унафэ къищтащ Отхман Аял УФ-р ибгынэн хуейуэ. Ауэ мы унафэмкIэ зэрымыарэзым къыхэкIкIэ иджыри зэ хэплъэжынууэ абы захуигъэзахэщ.
Мы Iуэхум ихьэлIа щытыкIэхэм къызэригъэлъагъуэмкIэ Отхман Аял Урысейм 20II гъэм хабзэм ипкъ итуэ «Пэрыт» жылагъуэ зэгухьэныгъэм ириогъэблагъэри ихьащ. Абы иужькIэ абы къыIэрихьащ зэманкIэ мы къэралым щыпсэунууэ хуит къэзыщI кIылъымпIэ. Ар щхьэкIэ Аял къыпаубыдащ ар здепха щIыпIэр къэзыгъэлъагъуэ тхылъымпIэр иIэн хуейуэ. Ауэ мы кIылъымпIэр Сирием къэралым и цIыхум иIэтэкъым, абы и щыхьэт тхылъым и зэманыр икIауэ щIэрыщIэу къыдихыжын хуейуэ зэрыщытым къыхэкIкIэ.
Iуэхум щыхэплъэм ипкъ итыуэ щIалэм и уэчылым хьэкумым зыхуигъэзащ ар къызыщхьэщыжым и лъэIур игъэзащIэу Налшык къалэ хьэкумым гъатхэпэм и I9-м къищта унафэр икъутэжынууэ. Ауэ УФ-м и Iэпхъуэшапхъуэхэм щелэжь IуэхущIапIэм и лIыкIуэм жиIащ а хьэкумым къищтауэ щыта унафэр мы хамэ къэрал щыщ щIалэр Урысей хабзэм къемызэгъыуэ республикэм зэрыщыпсэуам къыхэкIкIэ тэмэмууэ икIий лъабжьэ иIэу.
Республикэм и хьэкум нэхъыщхьэм къару иIэу къилъытащ Налшык къалэ хьэкумым Отхман Аял уасэу сом мин 2,5 итын хуейуэ къилъытар игъэзэщIэн хуейуэ, ауэ еджакIуэм Урысейр ибгынэныр мыIэмэлыншагъэу къилъытэри Iуихыжауэ «Кавказ Узел» информ къулыкъум учыл Къэрдэн Мухьэрбий жыриIауэ утыку къихуащ.
Хьэкум нэхъыщхьэм и унафэм къару игъуэтащ ар абы къыщищтам щыщIэдзауэ.
ЗэкIэрэ Отхман Аялрэ нэгъуэщI мы хьэкумым и зэхэгъэкIыным хэтахэмрэ я еплъыкIэхэр утыку къихуакъым.
Ауэ мы Iуэхум теухуауэ и еплъыкIэр Хуитыныгъэ радиом къыжриIащ Къэбэрдей адыгэ жылагъуэ зэгухьэныгъэхэм я хасащхьэм хэт Щхьэгъум Хьэсэн:
«Мы къекIуэкIа Iуэхум къигъэлъэгъуащ щIалэр зэрымыкъуэншар. Ар къуаншауэ щытатэмэ зырахъуэкIыжынутэкъым я унафэр. Мыдрей щIалэ икIыжарикI щIкIар, дапхуэдэу мыхъуми ирагъэкIжынуу къилъытати аращ. Ахэр щIырагъэкIыжын щIыхуэмейр иджыпсту Сирием зауэ щокIуэкI. Ахэм здэщыIэн ямыIэжыуэ я хэкужь къагъэзэжауэ цIыхухэр абы дэIэпыкъуауэ апхуэдэу щытуращи, а къэкIум удэIэпыкъун хуейщ, зауэм ебгъэгъэзэж хъунукъым. Иджыпсту месс Украинэми апхуэдэ дыдэ къыщокIуэкIри, урысыр къедгъэлын хуейщ, ахэм я бзэр тхъумэн хуейщ жаIэри, абы теухуауэ упщIэ къоувыр. Сыт адыгэхэри мы къэралым щыщщ, нэгъуэщI къэрал щыIэ адыгэхэри ди хэкуэгъущ. Ахэр сыт щIэтхъумэн хуэмейр?»
Фигу къэдгъэкIыжынщикIи мыпхуэдэу мэлыжьыхьым и 7-м Налшык къалэ хьэкумым учыл Къып Мадинэ и зыхуэгъазэныгъэр къилъытри, УФ-м и Iэпхъуэшапхъуэхэм щелэжь IуэхущIапIэм Сирием къикIыжа Абазэ Нарт зэманкIэ Урысейм щыпсэуну хуит къэзыщI и тхылъымпIэр къызэрамылъытар хабзэм къемызэгъыуэ игъэуващ. Мы Iуэхум хьэкумыр щыхэплъам яубзыхуащ Абазэ Нарт и тхылъымпIэхэр щызэхуэхъун хуей зэманым 2010гъэм махуищкIэ щIыблишамкIэ къуаншэр КъБР-м щыIэ УФ-м и Iэпхъуэшапхъуэхэм щелэжь IуэхущIапIэм щылажьэхэрауэ къыщIэкIащ.
Къэбэрдей-Балъкъэр. Хуитыныгъэ Радио. Баркук Инал