ЕгъэшIэрэ упчIэхэу лъэпкъым иблэкIыгъэрэ инеущрэ япхыгъэхэм, непэрэ мафэм адыгэм гумэкIыгъоу иIэхэм щатегущыIагъэх хы ШIуцIэ Iушъо шапсыгъэхэм я Адыгэ Хасэ зэхищэгъэ конференцием.
Темэ шъхьаIэу Iофтхьабзэм иIагъэр: «Шапсыгъэмэ яшэн-хабзэхэр, язекIо-шIыкIэхэр джырэ лъэхъаным зэрэдиштэхэрэр». Пшызэ шъолъыр игубернатор и Грантэу «Шапсыгъэхэр. Лъэпкъ шэнхэм ыкIи культурэм якъэухъумэн» зыфиIорэм къыдыхэлъытагъэу конференциер ПсышIуапэ щырагъэкIокIыгъ, ащ ипрограммэ хэтыгъэх мы лъэхъаным анахь зыгъэгумэкIырэ Iофыгъохэм ятегущыIэн. Конференцием иIофшIэн хэлэжьагъэх организацием исоциальнэ гъусэгъухэр, нахьыжъхэр, динлэжьхэр, гъэсэныгъэм, культурэм яIофышIэхэр, тарихълэжьхэр, лъэпкъ Iофыгъохэм агъэгумэкIыхэрэр.
Iофыгъоу конференцием къыщаIэтыгъэхэр зэзыпхырэр зы пшъэрылъ — зэдэIэпыIэжьхэзэ адыгэ лъэпкъым игушъхьэлэжьыгъэ баеу алъытэрэ шэн-хабзэр, икультурэ къэгъэнэжьыгъэнхэр ары. Мыщ ыпэкIэ илъэс пчъагъэхэм Адыгэ Хасэм изэфэсхэм ыкIи исессиехэм ар къащаIэтыгъ, Шъачэ ыкIи ТIопсэ районым ит псэупIэхэм ащызэхащэрэ зэIукIэгъухэм мызэу, мытIоу ащытегущыIагъэх. Джащ фэдэу, илъэс заулэкIэ узэкIэIэбэжьмэ, Адыгэ Республикэм ыкIи Краснодар краим я ДиндэлэжьапIэ къуаджэхэу Агуй-Шапсыгъэрэ Шъхьафитрэ конференциеу ащыригъэкIокIыгъагъэхэм а темэр ары шъхьаIэу ащыщытыгъэр.
Общественнэ парламентым бэмышIэу щызэхащэгъэ зэдэгущыIэгъуми ишIуагъэ къэкIуагъ. Ащ хэлэжьагъэхэр адыгабзэм, лъэпкъ культурэм ыкIи шапсыгъэмэ ятарихъ кIэнрэ якультурэрэ якъэухъумэн, хабзэ афэхъугъэ хъызмэтым изехьан лъагъэкIотэшъуным, ныбжьыкIэхэм адэлэжьэгъэным, нэмыкI Iофыгъохэми атегущыIагъэх.
— Адыгэ дунаим щыщ шапсыгъэмэ язакъоп мы Iофыгъоу зигугъу тшIыхэрэр зэпхыгъэхэр, зэрэлъэпкъэу, адыгэу зызылъытэжьырэ пстэури ахэм агъэгумэкIы, — къыхигъэщыгъ Адыгэ Хасэм итхьаматэу КIакIыхъу Мэджыдэ. — ИгъэкIотыгъэу ахэм атегущыIэх республикэхэм якъэралыгъо хабзэхэм ялIыкIохэр, общественникхэр, шIэныгъэлэжьхэр. Непэрэ конференциер — тызэрыуцогъэ чIыпIэ хьылъэр зэхэтшIэным, тызэгъусэу лъэпкъ гукъэкIэу хэхэс адыгэхэри чIыпIэрысхэри зэзыпхыщтыр къэдгъотыным изы- лъэбэкъу.
— Тилъэпкъ инеущырэ мафэ зэлъытыгъэ гумэкIыгъоу щыIэр макIэп, — къыкIигъэтхъыгъ ШIоикъо щыщ нахьыжъэу Шъхьэлэхъо Батмызэ-хьаджэм. — Нэбгырэ пэпчъ упчIэ зыфырегъэуцужь: сыдэущтэу джырэ лъэхъаным уцIыфэу, уадыгэу ыкIи убыслъымэнэу укъэнэжьышъущта? Сэ сшъхьэкIэ сыда сшIэн фаер адыгабзэр, адыгэ шэн-хабзэхэр къэгъэнэжьыгъэнхэм фэшI? Iофыр зы чIыпIэ идгъэкощыкIыным пае, цIыфхэм нахьыбэрэ тахэхьан, тадэгущыIэн фае, анахьэу ныбжьыкIэхэм, ахэм янэ-ятэхэм, къоджэдэсхэм.
КъэгущыIагъэхэм зэкIэми агу къикIэу, ыгъэгумэкIхэу адыгабзэм икъэухъумэнкIэ шIэгъэн фаеу алъытэрэр къаIуагъ, джащ фэдэу сабыеу къэхъурэр зэрэмэкIэ дэдэм, лъэпкъыр кIодыжьыным ащ зэрэфищэрэм, социальнэ-экономикэ ыкIи лъэпкъ-культурнэ гумэкIыгъохэм, ныбжьыкIэхэм япIун, адыгэ обществэм игушъхьэ лэжьыгъэ непэ изытет ягугъу къашIыгъ.
Конференциехэм ыкIи хы ШIуцIэ Iушъом щыIэ псэупIэхэм Iофыгъоу къащаIэтыхэрэм ащыщ джэгухэм ыкIи хьадагъэхэм япхыгъэ фэIо-фашIэхэм зыкIыныгъэ ахэлъхьэгъэныр.
Адыгагъэр — гущыIэшху, ар къэоIо къодыекIэ пкIэ иIэп, лъэпкъ зэхашIэр унагъом къыщежьэн, нэбгырэ пэпчъ ыгу илъын фае, ар къэгущыIагъэхэм къыкIагъэтхъыгъ. Мэфэ хэхыгъэ закъохэр арэп, сыдигъокIи уадыгэу зыплъытэжьынэу, адыгагъэ зепхьанэу щыт. АщкIэ нахьыжъхэм щысэ къагъэлъэгъоныр атефэ. ГумэкIыгъоу зытегущыIагъэхэмкIэ конференцием хэлэжьагъэхэм зигъо Iофыгъохэр къыхагъэщыгъэх, пшъэдэкIыжьышхо пылъэу адыгагъэр ахалъхьэзэ ныбжьыкIэхэр апIунхэу зэлъэпкъэгъухэм къяджагъэх. А Iофыгъор нэмыкIхэм апшъэ дэплъхьажьыныр тэрэзэп. Нэбгырэ пэпчъ ар иIоф шъхьа-эу къыкIагъэтхъыгъ общественникхэм. Тыкъэущыжьыным игъо къэсыгъ — неущ кIасэ хъущт.
Ныбэ Анзор
АМ
Comments
Post a Comment