Емыж МулиIэт (1951 - 2024)
Емыж МулиIэт щыIэжьэп... Адыгэ литературэм чIэнэгъэшхо ышIыгъ. Адыгэ гъашIэм зы Нэфынэ Iабгъу хэкIосыкIыгъ... Гукъэошхом еуцолIэгъуай...
Зы адыгэ бзылъфыгъэ епэсыгъэ гъашIэ МулиIэт къызэринэкIыгъ: еджагъ, унагъо ышIагъ, сабый ыпӏугъ... ФызэшIокIыщтым зы налъэ къыщимыгъакIэу, елъэкIыфэ лэжьагъэ. ИщыIэныгъэ хэтыгъэ цIыфхэм шъыпкъагъэ афыриIагъ, ныбджэгъукIэ - гупсагъэ. Зыми онтэгъу зыфимышIэу, псэ зэIухыгъэу, цIыфышIоу дунаим тетыгъ.
Ау МулиIэт иусэхэр шъхьафыгъэх - поэзие лъагэм итамыгъэх.
Тхьам къыхилъхьагъэу зыми фэмыдэ псэшIэныгъэ куу бгъодэлъыгъ. Шъхьафитэу, ямышIыкIэу гупшысэщтгъэ. Лъэпкъ гупшысэм зыхиIэтыкIзэ, дунаир зэхэзыхъытэрэ гупшысэ зэхэмыфхэр усэкIэ къыIотэн ылъэкIыщтгъэ...
Псэм щыгъэшIуагъэу, гум щипIугъэ гушIуагъохэм, гумэкIхэм ялъэужых МулиIэт иусэхэр. Зыхэр нэфынэх - адыгабзэр ащэбзэрабзэ, зыхэр нэшхъэих, адрэхэр - куо макъэх, гур агъэтакъоу... Ау уагъэфэхрэп усэхэм, къытэушъыи фэдэх зафэу дунаим тытетынэу, мы чIылъэми, шIу тлъэгъурэ цIыфхэми, гъогу напцэм Iут чъыгми, осэпсы гъуаткӏоу тхьапэм щысысрэми тафэсакъынэу... " тыгъэм иадырабгъу" нэмыкI дунайхэр зэрэщыIэр тщымыгъупшэнэу... Джыри гупшысэ тхьапша алъачIэ тынэмысыгъэу Емыж МулиIэт иусэхэм ахэушъэфагъэр?
"Орэд! ЕтIанэ сэрэкIод..." - джаущтэу къыщеIо иусэ горэм. ЗэриIуагъэу орэд папкIэу иусэхэр къытфигъанэхи ежь дунаим ехыжьыгъ.
Хабзэ щыIэмэ зыдэкIожьыгъэм, лъытэныгъэшхо зыфэтшIырэ тиныбджэгъу гупсэу Емыж МулиIэт тынчыгъо щигъотынэу, къыгъэнагъэхэм ужыпкъэ мафэ афэхъунэу Тхьашхом селъэӏу.
Профессор Унэрыкъо Рая
Comments
Post a Comment