Мэремыкъуэ Хъайри. Тыркум щыщ, и хэкужь, Къэбэрдей-Балъкъэрым игъэзэжащ.
Тыркум щыпсэу адыгэхэм я бжыгъэр мелуани 3-5 якум дэту къабж. Илъэс 150-м нэблэгъауэ хэхэсу псэу адыгэхэр иужьрей зэманым я хэкужь ягъэзэжыну нэхъ хуей хъуахэщ.
АрщхьэкIэ адыгэхэм щыщу зи хэку зыгъэзэжыну хуейхэр гугъу йохь. ГъащIэр хэкумкIэ нэхъ гугъуу зэрыщытым къинэмыщIауэ я хэкужьым и цIыху хъужыну хуейхэм ар къаймыхъулIэу щытщи. Iуэхугъэм теухуауэ и хэкужь зыгъэзэжа, Тыркум щыщ Мэремыкъуэ Хъэйри Хуитыныгъэ Радиом и микрофоным къедгъэпсэлъащ.
Мэремыкъуэ Хъайри: Сэ къызэрызгурыIуамкIэ мис дяпэкIэ зыгъэзэжхэр нэхъыбэ хъуурэ кIуэну согугъэ, сыт щхьа жыпIэмэ цIыхухэри хэкум тIэкIу нэхъ дихьэхыу хъуащ. Дунейми нэхъ зехъуэж.
Хуитыныгъэ Радио: ГъащIэм илъэныкъуэкIэ хэкужьым сыт хуэдэ гугъуехь щыIэ зыгъэзэжынухэм дежкIэ?
Мэремыкъуэ Хъайри: Пэжщ, гъащIэм нэхъ тыншу ущыпсэуф щIыпэр нэхъ къащтэр ауэ хэкум деж нэхъ гугъу уезыгъэхьынур щIалэгъуалэм лэжьапIэ ягъуэткъым.
ИтIанэ, лэжьапIэ зиIэхэми къалэжьыр яхуримыкъуу апхуэдэщ. Щыгъын, ерыскъы сытхэр лъапIэкIейщ. Еджэн жыпIэмэ цIыхухэм еджэныр къаух зэрыхъукIэ. Иджыпсту и хэкужь зыгъэзэжхэр нэхъыбэу щIалэгъуалэращ, еджэн сыт жыпIэми.
Хуитыныгъэ Радио: Тыркум адыгэу мелуан 3-5 щыпсэууэ жаIэ. Ауэ нобэр къыздэсым зи хэку зыгъэзэжар мащIэ дыдэщ, сыт жыпIэнт абы теухуауэ?
Мэремыкъуэ Хъайри: Адыгэр и хэкум къызэрикIрэ зэман куэд хъуащ. Апхуэдиз зэман дэкIауэ иджыпсту занщIэу сыт щIамыгъэзэжыр жыпIэм ар пэж хъункъым. Ауэ сыт хуэдизу гугъуми цIыхур и хэкум игъэзэжыну хуейщ. Абы теухуауэ документ Iуэхухэри иджыпсту гугъущ ар хуиту, тыншу ящIын хуейт. Зыгъэзэжыну хуейхэм я документхэр хуиту къраткъым. Хэкум и цIыху хъужыну хуейхэр гугъу Iей ирагъэхь. Паспорт къеIызыхынухэм илъэситхукIэ ерагъыу кърату аращ.
КавказымкIэ кърашыу Тыркум къаша адыгэ нысащIэхэм зэрыжаIэмкIэ, Тыркур сыт хуэдизу гъащIэ илъэныкъуэкIэ нэхъ тыншу щымытми, я щхьэгъусэхэми езыхэми я хэкужь Кавказым ягъэзэжыну нэхъ къащтэр.
Емуз Баязыт, Хуитыныгъэ Радио, Тюркие