Адыгэ лъэпкъым ишIэжь фэгъэхьыгъэ Дунэе Iофыгъоу «Iошъхьэмаф-2014-рэ» зыфиIорэм хэлажьэхэрэр шышъхьэIум и 17 - 19-м тиреспубликэ щыIагъэх. Автомобильхэм арысхэу тилъэпкъэгъухэр Тэхъутэмыкъое районым къикIыхи, Адыгэкъалэ къыщыуцугъэх. ШышъхьэIум и 18-м Мыекъуапэ идэхьапIэ хьакIэхэм ащыпэгъокIыгъэх.
Адыгэ шыухэр лъэгъупхъэхэу зэIукIапIэм къырыкIуагъэх. Купым ыпэ иуцохи, Мыекъуапэ иурам шъхьаIэхэм ащыщэу Пролетарскэм хьакIэхэр къытыращагъэх. Адыгэ быракъхэр агъэбыбатэхэзэ, республикэ филармонием дэжь щыт саугъэтэу лъэпкъхэм языкIыныгъэ игъэпытэн фэгъэхьыгъэм ыпашъхьэ къыщызэрэугъоигъэх.
Пресс-зэIукIэу саугъэтым ыпашъхьэ щызэхащагъэм нэбгырабэ хэлэжьагъ. Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэхахьэм къызэрэщиIуагъэу, хэгъэгу ыкIи шъолъыр зэфэшъхьафхэм ащыпсэурэ адыгэхэр зэIукIэу зыхэлажьэхэрэм имэхьанэ зеушъомбгъу. Дунэе Iофтхьабзэр мамырныгъэм игъэпытэн, лъэпкъ зэфэшъхьафхэм язэфыщытыкIэхэр нахьышIу шIыгъэнхэм афэгъэхьыгъ.
ЗэлъашIэрэ архитекторэу, сурэтышIэу Бырсыр Абдулахь иэскизхэм атехыгъэу саугъэтэу ашIыгъэм археологэу Тэу Аслъан къытегущыIагъ. Иорданием, Сирием, Тыркуем, къош республикэхэм къарыкIыгъэ тилъэпкъэгъухэм саугъэтыр зэрагъэлъэгъугъ. Лъэпкъ шIэжьым ехьылIэгъэ сурэтэу тешIыхьагъэхэм къакIэупчIагъэх.
Тиреспубликэ иобщественнэ движениеу «Адыгэ Хасэм» зэIукIэгъур щылъагъэкIотагъ. Адыгэ Хасэм итхьаматэу Бэгъушъэ Адамэ, Къуижъ Къэплъанэ, Хэкужъ Адамэ, Хьасанэкъо Хьамедэ, Нэхэе Аслъанэ, Сташъу Юрэ, Шъхьаплъэкъо ГъучIыпсэ, нэмыкIхэм Адыгэ Хасэм иIофшIакIэ къаIотагъ.
Хэкужъым къэзыгъэзэжьырэ тилъэпкъэгъухэм хьакIэщэу афашIырэм зэхахьэр щылъагъэкIотагъ. Адыгэмэ языкIыныгъэ игъэпытэн фэгъэхьыгъэ Iофыгъохэр щыIэныгъэм зэрэщыпхыращыхэрэм Беданэкъо Нихьад къытегущыIагъ. Унэе шIыкIэм тетэу агъэпсырэ хьакIэщым ишIын УтIыжъ Илькас кIэщакIо фэхъугъ.
Хьадпэшъо Ларисэ, Хъурэе Аслъан, Иорданием къикIыгъэхэ Намрыкъо Мустафэ, ШъхьапцIэжьыкъо Тарыкъу, Анцокъо Инал, нэмыкIхэу хьакIэхэм якуп хэтхэм унэм осэ ин фашIыгъ.
Дунэе Iофыгъоу «Iошъхьэмаф-2014-м» хэлажьэхэрэр Мэфэхьаблэ зэкIохэм, къуаджэм ипащэу М. Хьасани ящыIэкIэ-псэукIэ къытегущыIагъ. Шъхьэлэхъо Аскэр упчIэхэм джэуапхэр къаритыжьхэзэ, Мэфэхьаблэ хэхъоныгъэхэр зэришIыхэрэм, Сирием, Тыркуем, нэмыкIхэм къарыкIыжьыгъэ тилъэпкъэгъухэм унэ дахэхэр чылэм зэрэщагъэпсыхэрэм щигъэгъозагъэх. Къуаджэм дэсхэр шъхьэихыгъэу хьакIэхэм къадэгущыIагъэх. Купым хэтхэм «тыпшъыгъ, тэгуIэ» аIуагъэп. Мэфэхьаблэ иурамыкIэхэр зэрагъэлъэгъухэ ашIоигъоу къыкIэлъэIугъэх. Бысымхэм ар гуапэ къащыхъугъ. Мэфэхьаблэ изэхъокIыныгъэхэр къарагъэлъэгъугъэх.
Мыекъуапэ изыгъэпсэфыпIэ парк пчыхьэм адыгэ джэгоу щыкIуагъэр Лъэпкъ театрэу Цэй Ибрахьимэ ыцIэкIэ щытым иартистэу Джолэкъо Рэщыдэ зэрищагъ. Хьадпэшъо Маринэ, Нэгъуцу Саидэ, Теуцожь Маринэ, Харьковская Сана, Хъурэе Аслъан, нэмыкIхэри зэхахьэм щыуджыгъэх. Адыгэ Хасэм хэтхэр зэхахьэм чанэу хэлэжьагъэх.
Купым хэтхэр тыгъуасэ гъогу техьажьыгъэх. Шъхьащэфыжь ыуж Къэрэщэе-Щэрджэсым, Къэбэртэе-Бэлъкъарым ащыIэщтых. Кавказ икъушъхьэ лъэгэшхоу Iошъхьэмафэ дэкIоещтых.
Тигъэзетеджэмэ ацIэкIэ купым хэтхэм ямурадхэр къадэхъунэу афэтэIо.