Украинэм щыщ егъэзыгъэу игъэкощыкIыгъэ цIыфхэр Адыгеим иапшъэрэ еджапIэхэм ащеджэн алъэкIыщт. Фэдэ къэбарыр къэбар лъыгъэIэс амал зырызхэм къатыгъ. ДжырэкIэ хэку унэшъошIым илъэкI зэкIэ рихьылIэу ары къызэрэхыгъэщрэр ахэмэ зэкIэмкIи IэпыIэгъу афэхъунхэмкIэ. Мыщ фэдэу Украинэм къикIыжьыгъэхэм яIоф пылъхэу зэрэдэлажьэхэу, ащ готэу Сирием щыщ адыгэхэм Iофыгъохэр къызэрафыкъокIхэрэм бэдауш лэжьакIохэр ыгъэгумэкIхэу къыхагъэщы.
Фитыныгъэ радиом игущыIэгъугъэ Адыгеим щыщ бэдауш лэжьакIоу, хакIоу, журналистэу Къуекъо Асфар иеплъыкIэкIэ, фэдэ Кавказ хэкухэм Уркаинэм щыщ цIыфхэр къызэрэращэхэрэм ылъапсэр – урысхэм япчъагъэ нахьыбэ щашIмэ зэрашIоигъор ары:
Къуекъо Асфар: Сирием щыIэ адыгэхэр къэтщэжьынхэ зэтэIом, тыдыкIи тафэтхагъ, шъхьаем пхырыкIыгъэп. Митинг тшIыт зэтэIом тагъэшIыгъэп. ЕтIанэ къаIогъап, шъодгъэшIыщтэп аIуи. Джы мры кIалэми къаIуапэ, адыгэ тхьамыкIэхэр зэрыс санаторием къырагъэкIхэшъ, мыдрэ Украинэм къикIыгъэхэр рагъэтIысхьэх. Лъэпкъым иIофзэрифэу зыригъажьэкIэ урысхэр дэгъоу зэкъоуцожьых. Зэфэдэныгъэм тыфай. Урысыер ины, ащ амыщэу Кавказым ахэр къыращэх. Ар къызэрэбгырыIошъущтыр – урыс факторыр нахьыбэ зэрашIрэр ары.
Адыгэхэу Сирием къикIыжьыгъэхэр зэрагъэпсэуалъэрэм уегъэраза?
Къуекъо Асфар: Сэ сшъхьэкIэ пштэмэ сигъэразэрэп. Зэфэдэныгъэ щыIэмэ сшIоигъу. Урысхэм ялъэпкъ факъудыи. Тэри тилъэпкъ зыгорэ къыфакъудыин фаеба?
Украинэм щыщ цIыфхэу хьэзаб хэфыгъэхэр Адыгеим мафэ къэм нэбгыри I50 хъоу къыращэнэу къэралыгъо унэшъошIхэм унашъо къатыгъ. ДжырэкIэ нэбгырэ 370 кIахьэу Адыгеим ахэр щыIэхэу, гъэпсэфыпIэ чIыпIэхэм ачIэсхэу къэбар лъыгъэIэс амалмэ къаты.
Фитыныгъэ радиом пае, Щэрджэс Ларис
No comments:
Post a Comment