Адыгеим икъушъхьэхэр зэрагъэлъэгъунхэу ыкIи зыщагъэпсэфынэу къэкIорэ цIыфхэр зэкIэ ахэм ащызекIошъунхэм тегъэпсыхьагъэхэп. Ахэри, нэмыкIхэри къушъхьэм хэхьанхэм ыпэкIэ къэгъэнэжьэкIо отрядхэм якIолIэнхэшъ, зарагъэтхынэу щыт.
КъэгъэнэжьакIохэм зызыгъэпсэфынэу къакIохэрэм ренэу агу къагъэкIыжьы къушъхьэхэм зэращысакъынхэ фаехэр. Ахэм ахэгъощыхьэхэрэр ыкIи ащыфыкъохэрэр къызэрэхэкIыхэрэр зэкIэми тэшIэ.
Урысые Федерацием ошIэ-дэмышIэ IофхэмкIэ икъэралыгъо ГъэIорышIапIэ икъутамэу Адыгеим щыIэм ипресс-къулыкъу къызэриIорэмкIэ, цIыфхэм зызыкIарагъэтхын фаер къушъхьэм зыхахьэхэкIэ зыдэщыIэхэ чIыпIэхэр ашIэнхэу ыкIи, ищыкIагъэмэ, псынкIэу IэпыIэгъу афэхъунхэу ары.
Къушъхьэм хэхьанхэ хъумэ, къыхахырэ гъогум елъытыгъэу, ар зыщыщынагъор, зэпычыпIэ къинэу иIэхэр зыфэдэхэр къафаIотэщтых, узэрэзыфэсакъыжьын фэе шIыкIэхэр къараIощтых. Джащ фэдэу мэфэ благъэхэм ом изытет зыфэдэщтым щагъэгъозэщтых, агъэфедэнэу аштэгъэ пкъыгъохэр ауплъэкIущтых, гумэкIыгъо хафэхэмэ къэгъэнэжьакIохэм макъэ къазэрарагъэIущтыр, Iэзэгъу уцхэу аштэщтхэр, нэмыкIхэри афаIотэщтых.
Зызыгъэпсэфынэу Адыгеим икъушъхьэхэм ахахьэхэрэр зыщатхыхэрэр чIыпIитIу мэхъух. Зыр: къалэр Мыекъуапэ, урамэу Глухоир, 3, ошIэ-дэмышIэ IофхэмкIэ Адыгеим илъыхъокIо-къэгъэнэжьэкIо куп, телефоныр - 8 (8772) 52-32-01. ЯтIонэрэр: Мыекъопэ район, лъыхъокIо-къэгъэнэжьэкIо купэу «Лэгъо-Накъ», телефоныр - 8 (928) 462-05-45. КъэгъэнэжьакIохэм къызэраIорэмкIэ, мы лъэхъаным зыгъэпсэфэкIо куп 14-мэ зарагъэтхыгъ, ахэр нэбгырэ 200 фэдиз мэхъух.
Сурэтыр: ТхьакI, Адыгэ республикэ - tetistur.ru
No comments:
Post a Comment