ШIэныгъэ-лэжьыхэм къызэратхыжьырэмкIэ Урыс-Адыгэ заом ипэкIэ Адыгэ хэкум милион 2 фэдиз Адыгэ щыпсэущтыгъэ. Ахэр къуаджэ ыкIи къалэ 6000 фэдиз адэсыгъэх. Урыс империер Адыгэ хэкум илъэс 101 къезэуагъ. 1763 илъэсым щегъэжьагъэу 1864 илъэс нэс. Мы илъэсым Урыс империем Адыгэ хэкур ыщтэгъагъ. Заом къыкIоцI ыкIи хэкур зыщтэ нэужьыми Урыс империем Адыгэхэм лъэпкъ гъэкIод къаришIэлIагъ. Милион 2-м щыщэу хэкум къинэжьыгъагъэр мин 50 неIэп. Адрэ пстэум яныкъо агъэкIодыгъ адрэ ныкъор хэкум рафыгъ.
Урыс империем сыд зешIэми Адыгэ лъэпкъыр ыгъэкIодын ылъэкIыгъэп. Непэ Адыгэ хэкум мин 800 фэдиз Адыгэ щэпсэу. Ахэр къуаджэ ыкIи къалэ 160 фэдиз адэсых. Хэхэсым милион 4 ехъу щэпсэу. Ахэм анахьыбэр Тыркуер ары зыщыпсэухэрэр.
Мы картэу къидгъэуцуагъэр илъэс заулэ ипэкIэ Адыгэ сайтэу cherkessia.net къыдигъэкIыгъ. Картэр зэхигъэуцуагъэр Адыгэ республикэм щыщ кIэлэегъаджэу Хьасэныкъо Хьамид. Картым къуаджэ шъэ заулэ ит.
Мыгъэ 2014 илъэсым мыщ фэдэ картэ cherkessia.net джыри зэ къыдигъэIыгъ. Ащ къуаджэ нахьыбэ ит. cherkessia.net илэжьакIохэм ащыщ къызэрэтиIуагъэмкIэ Адыгэ къуаджэ мин 4 фэдизым яцIэхэр ыкIи чIыпIэу зыдэщысыгъэхэр гъэнэфагъэу щыIэх. Ахэр тапэкIэ ящанэрэ картэу къыдагъэкIыщтым итыщтых.
No comments:
Post a Comment