«ЧIыопс паркэу «Тхьа­чIышху» ныбжьыкIэхэр чIыопсым нэIуасэу афешIых

Сурэтыр Iэшъынэ Аслъан тырихыгъ

Адыгэ Республикэм икъэралыгъо учреждениеу «ЧIыопс паркэу «Тхьа­чIышху» зыфиIорэр кIэщакIо зыфэхъу­гъэ экологическэ Iофтхьабзэм къыкIэлъыкIоу бэмышIэу поселкэу Новопрохладнэм (Сахрай) иIэгъо-благъохэм арыт псыкъе­фэххэм адэжь ныбжьыкIэ экологическэ Iофтхьабзэу «Экологический десант» зыфиIорэр щыIагъ. Мыщ кIэлэцIыкIухэм шIэныгъэ тедзэ зыщызэрагъэгъотырэ республикэ Гупчэр хэлэжьагъ ыкIи апэрэу кIэлэеджакIохэм апае зэхащэ­гъагъ. Тыкъэзыуцухьэрэ дунаир къэухъумэгъэ­ным фэгъэхьыгъэ республикэ зэнэкъо­къоу рекIокIыгъэм текIоныгъэ къыщыдэзыхыгъэ кIэлэеджакIохэр арых зызыушэтынэу щытыгъэхэр.

Мыекъопэ, Шэуджэн ыкIи Джэджэ районхэм чIыопсым икъэухъумэн пылъ кIэлэеджэкIо 50 фэдиз къарыкIыгъагъэх. Пчэдыжьым жьэу ахэр поселкэу Новопрохладнэм зекIуалIэхэм, станицэу Даховскэм щыщ кIэлэеджакIохэр къахэхьажьыгъэх. Iофтхьабзэр псыхъоу Сахрай ипсыкъефэх дэжь щырекIокIыгъ, зэхэщакIохэм къагъэхьазырыгъэ творческэ ыкIи нэмыкI зэнэкъокъухэм зэкIэри чанэу ахэлэжьагъэх.

«ЧIыопс паркэу «ТхьачIышху» зыфиIо­рэм иинспекторэу АкIэгъу Данэ къызэри­IуагъэмкIэ, кIэлэцIыкIухэр командэхэмкIэ гощыгъагъэх ыкIи шъхьадж зыпылъ IофыгъомкIэ зэдэгощагъэх. ТичIыопс къызэтегъэнэгъэным, щынэгъончъэу щытыным афэгъэхьыгъэ зэнэкъокъоу «Сэ сыдепутат» зыфиIорэм хэлэжьагъэхэм тыкъэзыуцухьэрэ дунаир зэрифэшъуа­шэу къэухъумэгъэным пае гукъэкI гъэшIэгъонэу яIэхэр къаIотагъэх. Нэужым сурэтшIынымкIэ - «Живая вода» ыкIи творчествэм ылъэныкъоу «Фантазии лета» зыфиIохэрэмкIэ кIэлэеджа­кIохэр зэнэкъокъугъэх. Джащ фэдэу Iофтхьабзэм хахьэу пхъэ машIом дэжь орэдхэр къыщаIуагъэх, щышхагъэх.

Iофтхьабзэр зыщыкIогъэ чIыпIэр ошIэ-дэмышIэ IофкIэ къыхахыгъэп, илъэс къэс, гъэмэфэ лъэхъаным мы чIыпIэм зекIо къэкIорэ цIыфыбэ къыщызэрэугъои, тичIыопс идэхагъэ щызэрагъэ­лъэгъу.

- Мы IофтхьабзэмкIэ мурадэу тиIа­гъэр тичIыопс къэтыухъумэным пае къыткIэхъухьэрэ лIэужхэм ащ уасэ фашIэу къэтэджынхэр, зэрищыкIагъэм фэдэу тыкъэзыуцухьэрэ дунаир къызэтегъэнэгъэным, агъэкъэбзэным анаIэ тырагъэтыныр ары. КIэлэцIыкIухэр нахьыбэрэ дэпщыхэу тичIыпIэ дахэхэм нэIуасэ афэпшIыхэмэ, чIыопсыри шIу алъэгъущт, ащ дакIоу гъэкъэбзэгъэным ылъэныкъокIи ишIогъэшхо къэкIощт. Непэ ахэм ядгъэлъэгъурэр, ахатлъхьэрэр ары неущ зэрэпсэущтхэр. Ащ къыхэкIэу кIэлэцIыкIухэм шIэныгъэ тедзэ зыщызэрагъэгъотырэ республикэ Гупчэмрэ тэрырэ тызэгъусэу мы Iофтхьабзэм зыфэдгъэхьазырыгъ. ТичIыопс ишъэфхэм афэгъэхьыгъэ зэнэкъокъухэр нахь гъэ­шIэ­гъонэу зэрафызэхэтщэнхэм тыпылъыгъ. Ахэр нахь кIэдгъэгушIунхэм пае чанэу зыкъэзыгъэлъэгъуагъэхэм дипломхэмрэ шIухьафтынхэмрэ афэдгъэшъоша­гъэх. Шъыпкъэу къэпIон хъумэ, апэ тызыфэягъэр чIыопс паркэу «ТхьачIышхом» кIэлэцIыкIухэр тщэнхэу арыгъэ, ау ощх зэпымыоу щыIагъэм тигухэлъхэр къыддигъэхъугъэхэп, ащ екIолIэрэ гъогухэр Iэягъэх. Арэу щытми, Сахрай псы­къе­фэхым тщагъэх, нэмыкI чIыпIэ дахэхэри ядгъэлъэгъугъэх. Сызэрэхэп­лъа­гъэмкIэ, кIэлэцIыкIухэм зекIоныр лъэшэу агу рихьыгъ, агу къинэжьынэу бэ гъэ­шIэгъонэу къалъэгъугъэри. ТапэкIи мыщ фэдэ Iофтхьабзэхэр афызэхатщэхэзэ, шIуагъэ къытэу зэредгъэкIокIыщтхэм тыпылъыщт, - къыIуагъ Адыгэ Республикэм икъэралыгъо учреждениеу «ЧIыопс паркэу «ТхьачIышху» зыфиIорэм ипащэу Шэуджэн Инвер.

ЦIыфым ипсауныгъэ изытет зыфэдэр, тапэкIэ зыфэдэщтыр бэкIэ елъы­тыгъ тичIыопс икъэбзагъэ. ТизекIокIэ-шIы­кIэхэм, шъхьэкIэфэныгъэу ащ фытиIэм тищыIэныгъэ, типсауныгъэ бэкIэ зэрялъы­тыгъэр зэкIэми къыдгурыIозэ, къыт­кIэ­­хъу­­хьэрэ лIэужхэр ащ къыфэщэгъэн­хэ фае.

КIарэ Фатим - Адыгэ Макъ

Сурэтхэр: budetinteresno.info