АдыгеимкIэ егъэджэнхэр щызэхащэнхэу агъэнэфагъэх ефэндхэм яшIэныгъэхэр нахь хагъэхъонымкIэ. Мыр мы мафэхэм къыхигъэщыгъ Адыгеимрэ Пшызэ шъолъырымрэ ямуфтиеу Къэрдэнэ Аскэрбий, къетхы «Юга» зыфиIорэ интерент къэбар къулыкъум.
Ефэнд шъхьаIым игущыIэхэмкIэ, хэкум иунэшъошI иIэпыIэгъукIэ, ахэмэ джы унакIэ яIэ хъугъэ. Ащ гъэкIэжьыгъэнхэу рашIылIэхэрэр заухкIэ, динлэжьхэр щэзэрэжугъоинхэу агъэнафэу къыIуагъ динлэжьым.
Егъэджэнхэмрэ Адыгеим ислъам диныр щызэрэзэрахьэрэмкIэ иеплъыкIэкIэ Фитыныгъэ радиомкIэ гущыIэгъу тыфэхъугъ Мыекъопэ «Адыгэ Хасэм» ипащэу Чундышко Заурбий:
Чундышко Заурбий:
- Шъыпкъэу пIонэу щытмэ, сэ диным ащ фэдизэу сыфэщагъэу щытэп. Лъытэныгъэ афэсэшIы. Диным ныбжьыкIэхэр шъыпкъэныгъэм фигъасэу, IорышIэу, дахэм фигъасэхэу щытмэ хъунэу сэлъытэ. Ау унагъохэм бырсыр къарилъхьэу хъумэ, зэо-банэ къыхэкIмэ, Iашэхэр аштэмэ – ащ дезгъаштэрэп. Сэ сиунэ исых шIошI зиIэхэр, сэри шIошI сиI. Ау диным упылъынэу хъумэ сэмэркъэу дэпшIы хъущтэп. Бэ диным тыхэт аIоу, ау мэщытым къычIэкIыжьхэмэ, мыхъунхэр вшIэхэу. Сэ дин лэжьхэр сэшIэх, дин лэжьым ышIэн фаехэр ымышIэу, мыхъо-мышIэхэр ышIэхэу.
Фитыныгъэ радио:
О зэрэплъытэрэмкIэ, Адыгеим ыужрэ уахътэм диным нахь зыфагъэзагъэу укIэлъыплъэн плъэкIыщта?
Чундышко Заурбий:
- Сэ сиеплъыкIэкIэ, лъэшэу дэпкIэягъэу слъытэрэп, ау мары мэщ ытым сыблэкIми бэрэ сэлъэгъу дэхэкIае ныбжьыкIэхэр екIуалIэхэу. Зыфэгъэхьыгъэр сэ сшIэрэп, ау, ахэр АдыгеимкIи дэхэцIыкIоу щэпсэух.
ШIэныгъэдэжьыбэмэ зэралъытэрэмкIэ, ислъам диным Темыр-КъохьэпIэ Кавказым щызэбгырыкIынэу къыщежьагъ я I8 лIэшIэгъум ыкIэм я I9 лIэшIэгъум икъежьэгъум. ДжырэкIэ Адыгеим ыужрэ къэтынхэмкIэ, быслъымэн мини I20 ехъу щэпсэу. Ахэм ащыщэу быслъымэн шъыпкъэхэу плъытэн плъэкIыщыр %30 фэдизыр ары, динлэжьмэ къыфзэраIорэмкIэ. Мэщытэу хэкум итыр 40 фэдиз. Адыгеим тегъэпсыхьагъэу ислъам диным теуфагъэу апшъэрэ еджапIэ дэтэп джырэкIэ. Ащ фэдэр Къэбэртэе-Бэлъкъарым икъэлэ шъхьаIэу Налщык щэлажьэ.
Фитыныгъэ радио, Щэрджэс Ларис