Ар Хуитыныгъэ Радиом мэремым къыжриIащ, зызгъэмэжалIэхэм ящыщ Ахкубеков Азэмэт и уэчыл Шак Лизэ. Нэрыбгэ 50-м мэжэлIэн щIадзащ мэкъуауэгъуэм и 12-м.
Шак Лизэ: НтIэ пэжщ ахэм шхэн щагъэтащ. ЗэхэгъэкIыныгъэхэр ирагъэкIуэкIыху яубыдахэр здаIыгъ хьэпсэ унафэщIхэр хуабжьу ткIийуэ къахущытщ.
ЦIыху мыарэзыхэм шхэн щIыщагъэтахэм апхуэдэу ящыщщ Iыхьлыхэм къыхуахьхэр зэрырамытыжыр. Ахэр армырми дунейм къыпыбзыкIауэ щытщ, абы и гущIыIужкIэ яIэ хуитыныгъэхэри якъутэ.
Мыарэзыуэ зызгъэмэжалIэхэм зэражаIэмкIэ, хьэпсэм зэрис щытыкIэхэр нэхъри йокIакIуэ муслъымэн нэщI мазэр щыщIидзэну мэкъуауэгъуэм и 28-р къэгъунэгъуху. Хьэпсэ къулыкъущIэхэр пэрыуэгъу мэхъу муслъымэнхэм нэмэз щащIкIэ, жэщкIэ уэздыгъэр ягъэункIыфI.
Муслъымэн 50 зызгъэмэжалIэхэр 2005 гъэм Къэбэрдей-Балъкъэрым щыIа теуэныгъэмкIэ ягъэкъуаншэхэращ. Апщыгъуэм жэпуэгъуэм и 13-м IэщэкIэ узэда гупхэр теуат Налшык дэт къару къулыкъущIапIэхэм.
ХабзэхъумэкъулыкъущIэхэм къызэратамкIэ, теуэныгъэм хэтащ 200-м нэблагъэ. Ахэр Къэбэрдей-Балъкъэрым щыщт, я ныбжькIэ, ику иту, илъэс 17-м къыщыщIэдзауэ 30-м нэсу.
МахуитIым нэблагъэкIэ екIуэкIа зэхэуэхэм хэкIуэдащ мамыр цIыху 13, къару къулыкъущIэу 35, теуэныгъэм хэтауэ зыхуагъэфэща 93. ТеуэныгъэмкIэ гурыщхъуэ хуащIу яубыдащ нэрыбгищэм нэс. Республикэм щыщ куэдым къалъытэ, террористу жаIэу яукIахэм я нэхъыбэр мамыр цIыхухэу, зэрымыщIэкIэ зэхэуэм хэхуахэу.
Налшык теуэныгъэмкIэ ягъэкъуаншэу иджыпсту хьэкум пащхьэ итщ нэрыбгэ 57. Ахэм я нэхъыбэм къуаншэу зыкъалъытэжкъым. Хьэкъум хьэкъым къеджэн щIадзэн хуейщ мы мазэм и 30-м щегъэжьауэ. Прокуратурэр мэлъаIуэ нэрыбгэ 57-щыщу 7-р игъащIэ псокIэ хьэпсэм ирагъэтIысхьэну.
2005 гъэм щыIа теуэныгъэм ущхьэгъу хуэхъуащ къару къулыкъухэм зэрахьэ бзэджагъэр, хабзэншагъэр, жэуаплыгъэншагъэр. Апхуэдэр жаIэ зи бын зыфIэкIуэда анэ-адэхэми, пэжырытелъхьэхэми, цIыху хуитыныгъэ хъумакIуэхэр республикэм щыщу зэупщIахэми.
«Профилактикэ Iуэху» зыфIащахэр убгъуауэ ирагъэкIуэкIт. 2004-2005 гъэхэм Къэбэрдей-Балъкъэрым «щыщIапъыкIащ» цIыху минипщI бжыгъэхэр, пщIы бжыгъэхэр яубыдащ. Терроризмым драгъэкIуэкI бэнэныгъэр хуагъэкIуэжащ муслъымэн зи цIэхэр зэхэзехуэн щIыным.
АпщIэндэху. Мы тхьэмахуэм, мэкъуауэгъуэм и 12-м Къэбэрдей-Балъкъэрым деж зауэлIу хуагъэфащэри нэрыбги 3 яукIащ.
Урысейм и лъэпкъ террорпэкъуащIэ гупжьейм къет, ахэр хабзэншэу IэщэкIэ узэда гупхэм яхэтауэ, укIыгъэхэмрэ хъунщIэныгъэхэмрэ япхауэ.
Хъыбар къызэратымкIэ, а Iуэхум хэтахэм ящыщу офицеритIи уIэгъэ хъуащ.
А къэхъугъэм махуищкIэ ипэжу, зауэлIу хуагъэфащэри нэгъуэщI нэрыбги 4 щаукIащ Къэбэрдей-Балъкъэрым деж.
Хуитыныгъэ Радио. Къардэн Аминат
КъэIогъэн фае, мы кIалэ 50 Налчик хьэпсым чIэсхэм анахьыбэр Адыгэх. Джащ фэдэу Къэбэртае-Бэлкъарым иполициерэ имухъабаратрэ терорым тебэны аIоу мы аужьырэ илъэсхэм кIалэ шъэ пчъагъэу аукIыгъэхэм анахьыбэр Адыгэх.
ТIуапсэ Пресс