17.6.14

Адыгэ лъэпкъ-гъэк1одым епхыгъэ хэбзэгъэуцугъэр Украинэ Парламентым щагъэпытагъ

Адыгэ лъэпкъгъэкIодым икъэштэн теуфэгъэ хэбзэгъэуцугъэр Украинэ Радэм щагъэпытагъ. Хэбзэгъэуцугъэм хэплъэнхэу Парламентым хэзылъхьагъэр украинэ депутатэу Ляшко Олег. Фэдэ къэбарыр къыхигъэщыгъ Фитыныгъэ радиом игущыIэгъугъэ израиль политологэу Шмулевич Авраам. Ащ игущыIэхэмкIэ, Iофыр украинэ Парламентым щежьагъ. Ляшко Олег ишIуагъэкIэ, хэбзэгъэуцугъэм ихэплъэнхэ Iофыр къэблэгъэрэ зэхэсыгъом щыIэнкIи хъун, ар зэпхыгъэр ежь Парламентым иIэкIоцI Iоф къекуIокIыныр зэрагъэпсрэр ары.  Мэкъэ хэхыныгъэкIэ ар аштэнэу къэблэгъэрэ уахътэм къэт, еIо Шмулевич Авраам.

Фитыныгъэ радиом игущыIэгъугъэ Шмулевич Авраам:

- Ляшко Олег – украинэ политикэи идэкIоерэ жъуагъу. Къэралыгъо Iэшъхьэтет хэдзынхэм ащ я 3 чIыпIэр щиубытыгъ. Арышъ, хэбзэгъэуцугъэр аштэнымкIэ зэшIокIхэр зэкIэ щыIэх. Ар къызыхъушъущтыр къэIогъуае. Ар елъытыгъ, Украинэм къыщекIокIрэ щытыкIэм.

Фитыныгъэ радио:  Авраам, Украинэ Парламентым фэжъугъэкIогъэ фэгъэзэныгъэмкIэ адыгэ бэдаушхэми, бэдауш купхэми еплъыкIэ зэфэшъхьафхэр къыхагъэщыгъэх. Зыхэм дырагъэштагъ, зыхэм яемызэгъ къыхагъэщыгъ. О мы Iофым сыдэущтэу уеплъыра?

Шмулевич Авраам:

- Лэпкъ пэпчъ ежь яеплъыкIэ яI. Урыс-Кавказ заом игъом щыIагъэх адыгэхэу урысыдзэм готхэу зэуагъэхэри, ащ пыщытыгъэхэри. Мы IофымкIи джащ фэд. Адыгэ лъэпкъгъэкIодым икъэштэн пыщытхэри щыIэх, Ар ежьхэм янамыс иIоф.

Фитыныгъэ радио: Джыри сыд къыхэбгъахъомэ пшIоигъор, Авраам...

Шмулевич Авраам:

- Сэ зэрэслъытэрэмкIэ, мы Iофыр - тарихъ шъыпкъэныгъэм игъэкIэжьын.  Мыр умыгъэкIэжьэу зыпкъитыныгъэр щыIэшъущтэп, адыгэ упчIэм изэшIохын къэхъушъущтэп. Урысыем ыгъэфедэхэрэ амалхэу Урысые-Кавказ заом игъом ыгъэфедэщтыгъэхэм афэдэхэр ыгъэтIылъыжьын фае. Дэи, Урысыем ицIыфхэр ежь яхькумэт нэсынхэм пае, егъэзыгъэ мэхъух нэмыкI къэралыгъохэм яхьыкумэтхэм зафагъэзэнэу. Урысыем иПарламент ары апэрэеу а тхьамыкIэгъошхор къэзыштэн фэягъэр.

Фитыныгъэ радио: Авраам, о зэрэплъытэрэмIэ,  Украинэм ыуж сыд фэдэ къэралыгъуа зызфэбгъазэнэу щытыр?

Шмулевич Авраам:

-Сэ сэлъытэ, къэралыгъохэм зэкIэм зафэбгъэзэн фае. ГъэшIэгъоны, адыгэхэу, гущыIэм пае Израиль исхэр Израиль зызэрэфамыгъазэхэрэр, Тыркум исхэр Тыркум зызэрэфамыгъазэрэр. КIэух иIэнэу сэлъытэ Европэ Парамным зыфэбгъазэмэ адыгэ лъэпкъгъэкIодыр къаштэнымкIэ, Америкэ Штат Зэкъотхэм яСенат, Скандинав къэралыгъохэм яПарламент, Къохьап2эм икъэралыгъо пэрытхэм. Мы Iоф-екIокIыныр зежьэкIэ, къэгъэуцугъуае хъущт.

Фэгъэзэныгъэу Украинэ Парламентым фырагъэхьыгъэр жъоныгъуакIэм и I6 атIупщыгъ. КIэлъэIум кIэтхагъэхэм ащыщ Адыгеим щыщ журналистэу ЩэшIэ Аслъан, тарихълэжьэу  Абрэдж Альмир, израиль щыщ политологэу Шмулевич Авраам, Дунэе Къушъхьэ Конгрессым икоординаторэу Дагъстан щыщ Магомедов Магомед, Къохьэпэ хэхыныгъэ зыфиIорэ партым хэт Кулокова Эльвира, Адыгэ дунэе лъэпкъ-культурэ гупчэу «Фитыныгъэр».

Фитыныгъэ радио, Щэрджэс Ларис

Сурэтым итыр  Украинэ парламентым идепутатэу Ляшко Олег